【2019親子攻略】帶你睇勻全港22個嬉水池!(新界區篇)

先前已經為大家介紹咗港島區同九龍區嘅嬉水池，今次帶嚟擁有最多泳池嘅新界區，到底呢區嘅嬉水池係咪真係咁好玩?

新界區

新界區嘅泳池相當精采，一共有22個游泳池，差唔多區區都有大型滑水梯，唔單止適合追求刺激嘅小朋友，就連大人都想瀡埋一份！當中天水圍游泳池同馬鞍山游泳池是唔少家庭嘅最愛，但其實唔只呢兩個泳池好玩，大埔游泳池更加係擁有全港數一數二大嘅滑水梯，唔使20蚊就可以好似入咗水上樂園咁！另外亦有一些泳池雖然冇大型滑水梯，但一樣係渡過親子時光嘅好去處，識玩一定要去！

[將軍澳游泳池]

佔地2.5公頃嘅將軍澳游泳池係新界最大嘅公眾泳池，非常受歡迎。裏面坐擁4條滑水梯，同時亦有其他畀小朋友玩嘅設施如小滑梯同水槍！不容錯過！

點擊<將軍澳游泳池>查看詳細泳池資訊

[西貢游泳池]

想感受西貢假日風情、食海鮮之餘，仲可以同小朋友一齊玩下水，西貢游泳池絕對係你嘅選擇。泳池有兩條滑水梯，另設有小滑梯同蘑菇形瀑布，適合一家大細唔同年齡一齊玩！

點擊<西貢游泳池>查看詳細泳池資訊

[大埔游泳池]

全港之冠！大埔游泳池擁有全港數一數二大嘅組合滑水梯，一共有6條！年紀較大嘅小朋友，甚至爸爸媽媽，想一齊瀡餐飽一定要揀嚟大埔，今個暑假不容錯過！

點擊<大埔游泳池>查看詳細泳池資訊

[上水游泳池]

上水游泳池嘅三條滑水梯都係直落冇轉彎，雖然望落唔太長，但係玩落卻係另一種刺激！另設有戶外按摩池，爸爸媽媽可以去休息一下！

點擊<上水游泳池>查看詳細泳池資訊

[天水圍游泳池]

天水圍成個池都係嬉水池，專為大人細路玩水而設！除咗3條有大急彎嘅滑水梯，仲有一條小朋友專用嘅滑水梯！想抖一抖？同場有日光浴場同埋池畔休息座椅，可以坐低慢慢休息。

點擊<天水圍游泳池>查看詳細泳池資訊

[馬鞍山游泳池]

馬鞍山游泳池之所以極受歡迎，皆因佢個滑水梯夠高，足足有成9米，唔單止刺激，仲可以從高處欣賞吐露港無敵大海景！除咗最高，馬鞍山游泳池嘅滑水梯更加係全港最快，十分適合追求刺激嘅朋友仔；嬉水池佔成個泳池接近一半，設施同玩樂空間十分充足，包括噴水池、鱷魚同鯨魚形噴泉等等，大人、小朋友、幼兒都玩得開心，就算跨區都值得一去！

點擊<馬鞍山游泳池>查看詳細泳池資訊

[青衣游泳池]

青衣游泳池總共有3條滑水梯，速度同馬鞍山比較起嚟相對慢啲，就算唔善於游水嘅小朋友都可以試玩，嘗試喺青衣踏出玩滑水梯嘅第一步！

點擊<青衣游泳池>查看詳細泳池資訊

[城門谷游泳池]

城門谷游泳池一共有2條滑水梯，嬉水池入面有噴水池、噴泉等等。不過暑假時段城門谷游泳池人流往往都偏多，唔想同其他人逼就可能要考慮一下。

點擊<城門谷游泳池>查看詳細泳池資訊

[顯田游泳池]

位於大圍嘅顯田游泳池雖然冇前面所介紹嘅大型滑梯，但一樣有好多設施啱小朋友玩，如小型滑梯、蘑菇瀑布同埋跳躍噴泉；室內仲有按摩池可供享用。因為地理位置關係，人流唔算多，又一個「唔想迫之選」。適合爸爸媽媽小朋友一齊玩嘅好推介！

點擊<顯田游泳池>查看詳細泳池資訊

[屯門西北游泳池]

新淨之選！2012年啟用嘅屯門西北游泳池相當新淨，廣受市民歡迎。入面唔單止有室內嬉水池，亦有按摩池，同樣係大人小朋友鬆一鬆嘅好地方。

點擊<屯門西北游泳池>查看詳細泳池資訊

[賽馬會仁愛堂游泳池]

介紹完新建嘅游泳池，就要介紹下有番咁上下歷史嘅！1984年啟用嘅賽馬會仁愛堂游泳池，佢嘅嬉水池係康文署轄下歷史最悠久嘅一個。唔少街坊、家長都表示裏面設施好新淨同好玩；泳池入場人次算少，又一個清靜之選！

點擊<賽馬會仁愛堂游泳池>查看詳細泳池資訊

[荃景圍胡忠游泳池]

區區都咁多人，嚟到介紹最後一個游泳池，就推薦一個清靜啲嘅啦！

翻查紀錄，同樣擁有嬉水池嘅荃景圍胡忠泳池近呢幾年入場人數都唔多，甚至試過全港入場人數最低嘅位置，全因裏面嘅嬉水池設施唔多。 不過，有唔少嘅街坊會因為城門谷游泳池太過多人而轉去呢度，想同屋企人游個靜水，荃景圍胡忠泳池，可以一試。

點擊<荃景圍胡忠游泳池>查看詳細泳池資訊

延伸閱讀:
【2019親子攻略】帶你睇勻全港22個嬉水池!(港島區篇)
【2019親子攻略】帶你睇勻全港22個嬉水池!(九龍區篇)