冬天學游水好多家長問，係唔係需要幫小朋友買返件保暖衣呢？我自己覺得，如果小朋友仲處於學游水階段，而家長又唔想響秋天冬天時暫停游泳課，廢事小朋友下年又重頭學過，咁就需要購買一件保暖衣啦。我將會同大家講解一下購買保暖衣時，要留意嘅地方，當中包括保暖衣嘅物料、款式、配搭等等，方便大家去購買保暖衣時，可以按小朋友嘅需要，購買到合適的保暖衣。
《物料》
【保暖衣的原理】
保暖衣嘅原理好簡單，大家可以幻想他就是一件可以響水入面着嘅羽絨褸；平時我哋冬天嘅時候，着羽絨褸可以保持身體溫暖，因為褸入面嘅絨毛，鎖住咗好多空氣，而空氣本身又係一種很好的絕緣體，傳熱效果慢，所以令到身體體溫唔會直接流失到周邊凍嘅環境。而我地平時會著嘅保暖衣，就係透過一層叫做Neoprene嘅橡膠物料，去做到羽絨褸嘅效果，呢一層Neoprene橡膠，生產時注入了氮氣，造成裏面有大大小小嘅窿窿，咁樣就可以隔絕池水同身體嘅直接接觸，著咗上身就冇咁快覺得凍。而巿面上嘅保暖衣，除咗呢一層橡膠物料之外，一般都會添加一層面料以及一層底料；面料會都係一啲泳衣嘅布料，有顏色或者印上公仔圖案、具有彈性、防紫外線等等功能。而最裏面接觸到皮膚果層，不同款式可能都用不同材料，有一般泳衣料，增加穿著嘅舒適度，亦有可能係厚身一啲、具有保暖功效嘅毛巾料。
【不要只留意mm】
小朋友嘅保暖衣，購買時你會發現佢會寫幾多mm，呢個數字就係neoprene橡膠層嘅厚度，一般來說越厚就代表橡膠層鎖到嘅空氣量越高，4mm會比3mm保暖，而3mm又會比2mm保暖。但係，因為Neoprene嘅布料亦都有分唔同級數，所以就算話兩件剪裁同厚度都一樣的保暖衣，保暖效果都可以大不同；當中最高級嘅係CR料，其次係SCR料，而最低級嘅就係SBR料。CR材料生產嘅保暖衣，鎖水效果最佳，保暖程度亦最高；如果你可以攞上手試，就會發現佢柔軟以及具有彈性，有好似拉橡筋嘅感覺，小朋友著上身就舒服啲；而因為一分錢一分貨，保暖衣價格會比SCR/SBR嘅保暖衣貴少少。SCR同SBR材料生產嘅保暖衣，鎖水效果就一般，保暖程度自然冇CR料咁強；加上佢地嘅抗壓性較差，所以如果購買呢一類保暖衣，記得避免長時間有重物壓住，否則它的鎖水功能便很快減弱；同埋呢一類嘅保暖衣，隨著日子推移，佢嘅衫身就會開始變硬。
《款式及配搭》
【款式】
保暖衣中間Neoprene夾層，透過隔絕池水直接接觸皮膚，令體溫不會流失太快；保暖衣物料級別有差異，CR料具高彈性同高保暖程度；咁我地依家就同大家睇下不同款式嘅保暖衣，佢地各有嘅優點缺點：
1）長袖 vs 短袖
長袖可以覆蓋身體較多部分，保暖效果強於短袖；但短袖嘅可活動幅度就較大，尤其好多蛙式動作手臂都係要屈曲同伸直；除非小朋友真係好怕凍，否則我之前一直都係建議家長買短袖款居多。但最近，巿面上開始有CR料嘅長袖保暖衣供應，呢啲新款嘅保暖衣可以做到保暖之餘，又唔會話影響小朋友嘅手臂活動。
2）連身 vs 半截
連身保暖效果較好，始終有機會入水嘅地方只有少少嘅袖口同領口部分。半截嘅款式就穿著容易，同埋有啲小朋友如果有肚腩嘅，連身嘅保暖衣有機會會箍住肚仔，令佢地覺得緊同唔舒服；呢個情況，家長就可以買一件半截保暖衣，再加配一條抓毛長褲去配搭。
3）前開 vs 後開
前開嘅剪裁方便穿著，但為咗避免頂住喉嚨位，衫領位會特登造低一點，而亦冇後開款式造得咁貼頸；加上拉鍊位會係泳池水流入流出來源之一，我地背脊一般較受抵得住冷，所以我自己都會建議學生買後開嘅款式。但如果小朋友年紀太細，而上堂時又要自己換衫或者去洗手間，前開拉鏈嘅保暖衣就方便啲去除同著。
《配搭》
除咗以上講過嘅物料、剪裁等等，大家購買時更加要注意，响唔頂檔嘅情況下，一定要㨂選一件領口、袖口、褲管口貼晒身體嘅保暖衣，唔好諗住買鬆少少可以著多一季；因為如果泳池水由這些空隙流入流出，透過熱傳導作用，就會將身體體溫帶走，做唔到保暖衣原先嘅效果。但係小朋友嘅高矮肥瘦都各有不同，萬一袖口位褲管位有鬆，咁有啲咩辦法呢？大家其實可以幫小朋友添加游水專用嘅長袖抓毛衫同長褲，去填充保暖衣裏面多餘嘅空位，咁就令泳池水更難從袖口褲管流入流出，大大增強保暖效果。
【全場總結】
一件好嘅保暖衣，可以提升小朋友嘅學習體驗，亦可以令他們持續學習，不用每年泳季又重頭學過。所以各位家長購買時，一定要留意以下3點！！！
1）材質
2）款式
3）配搭
以確保件保暖衣達至最佳嘅保暖效果；如果唔清楚嘅，都可以問下自己嘅游泳教練，又或者上網做下功課，了解邊個品牌或者款式較為適合自己小朋友。
Swim Sports INFO
