點樣揀一副啱自己嘅泳鏡，去避免入水呢個問題
我地會介紹一個好好用嘅測試方法
去測試你揀嘅泳鏡，啱唔啱你嘅眼形面形。

目錄：

• 泳鏡入水3大原因
• 第1步，揀適合自己年齡層嘅種類
• 第2步，揀適合你游泳目的嘅泳鏡系列（休閑/競賽款）
• 第3步，揀鏡面嘅顏色（室內/戶外/反光鏡片）
• 第4步，睇下鼻樑同泳鏡帶有冇得調校
• 如果你有近視 就要揀有度數嘅泳鏡
• ⭐️負壓測試⭐️

⚠️泳鏡入水3大原因⚠️

泳鏡有唔同尺寸，大框、中框、細框，而當中亦有分休閒同競賽款式。所以，如果㨂錯泳鏡款式唔啱眼形，中間嘅空隙就會滲水入去。

除咗我哋嘅眼窩唔FIT副泳鏡，每個人嘅鼻梁位都有闊同窄，呢個都會影響佩戴者嘅貼合度。

泳鏡有機會因存放太耐，又或者保存的方式不正確，例如長時間曝曬，泳鏡嘅膠邊就會氧化，失去原先嘅柔韌度或者破裂。

咁究竟點樣先可以搵到一副，
啱自己或者啱自己小朋友嘅泳鏡呢？
只要跟住以下四步驟，最後做埋負壓測試就可以啦

第1️⃣步，揀番適合自己年齡層嘅種類

大人就揀成人系列，中童或者小童就分別揀番相對嘅系列。因為泳鏡生產商收集左大量面形同眼窩嘅數據而根據呢啲資料去設計不同泳鏡系列揀番合適嘅年齡類別就可以。

第2️⃣步，揀適合你游泳目的嘅泳鏡系列（休閑/競賽款）

休閒或者練習用途嘅泳鏡，一般會寫住 FITNESS/LEISURE/COMFORT 鏡框會大啲闊啲視野廣啲之餘，所以呢一類泳鏡較舒適，可以長時間配戴。

而比賽用途嘅泳鏡，一般會寫住PERFORMANCE/ELITE之類，個鏡框會細啲，視野較窄，部分鏡框仲會係冇膠邊，從而做到最貼臉減低水阻嘅效果，咁就可以令專業級嘅運動員爭取更快嘅時間。

第3️⃣步，揀鏡面嘅顏色（室內/戶外/反光鏡片）

如果經常都係游室內泳池嘅，可以選擇一啲透明或者相對淺色鏡面嘅泳鏡，咁就會睇得更加清楚，同埋夠光。

相反，如果係响戶外游水較多。例如海灘或者戶外泳池，就需要選擇一啲比較深色嘅泳鏡去保護返我哋嘅眼睛。

想要再進一步阻擋紫外線，我哋可以揀一啲有反光塗層嘅泳鏡，咁就更有效反射紫外線達到更佳嘅保護效果。

第4️⃣步，睇下鼻樑同泳鏡帶有冇得調校

中童或者小童，因為鼻樑高低分別不太大，所以一般中小童泳鏡都係一體式鼻梁嘅設計，唔可以更換或調校寬度。

但係成人嘅款式，就通常有得調校鼻樑嘅，買返嚟嘅時候有一組不同大細嘅鼻梁調節，所以購買時候記得CHECK一下。

如果雙帶或者粗身嘅單帶設計，更加有效令泳鏡固定响頭部。

如果你有近視 就要揀有度數嘅泳鏡

❗️❗️留意番，因為响水裏面嘅折射，會令到你睇野放大咗，所以揀近視泳鏡嘅時候就需要按自己近視度數減50度，例如你係200度近視嘅話，就需要揀返150度嘅近視泳鏡咁就避免游到暈陀陀嘅情況發生。

兩隻眼嘅度數係唔一樣嘅話，我哋通常會跟番度數較低果隻眼，去揀合適嘅度數泳鏡。

如果兩隻眼嘅度數相差得真係太遠，某啲品牌會有組合式嘅近視泳鏡，你就可以根據自己左右眼睛合適嘅度數，去選擇左右邊嘅鏡片

⭐️負壓測試⭐️

首先我地唔需要戴上泳鏡帶，直接雙手揸住鏡框，再用少少力吸落隻眼度，將鏡框內空氣迫走。只要雙眼或其中一邊眼睛吸緊唔掉落大約5秒，基本上呢一副泳鏡就已經係合適你嘅眼型